ვულოცავ ამერელებს ამ თასის დაუფლებას! 
FC AMERI 3 - 2 FC ZESTAFONI
გუშინ საქართველოს თასის მფლობელი გახდა 5 წლის ისტორიის მქონე, თბილისური კლუბი FC AMERI 13 მაისს გამართული საქართველოს თასის ფინალი უდავოდ ერთ–ერთი საუკეთესო გადამწყვეტი შეხვედრა იყო გათამაშების ისტორიაში: მაყურებელმა იხილა ყველაფერი, რის გამოც უყვარს ფეხბურთი: გოლები, ბრძოლა, პენალტები, რასაც საოცარი დაძაბულობა აგვირგვინებდა. თბილისის "ამერმა" ზესტაფონის "ზესტაფონის" დამარცხება პენალტების სერიაში შეძლო: ძირითადი და დამატებითი დრო ფრედ 2:2 დასრულდა, "საფეხბურთო ლატარეაში" კი უფრო ზუსტნი დედაქალაქელები აღმოჩნდნენ – 4:3. სანამ უშუალოდ თამაშის პერიპეტიების აღწერაზე გადავიდოდეთ, სათქმელია, რომ ორგანიზატორებმა შესანიშნავად გაართვეს თავი ამოცანას – ფინალურ შეხვედრას საკმაოდ ლამაზი შოუ უსწრებდა და რაც ყველაზე მნიშვნელოვანია, მიხეილ მესხის სახელობის სტადიონი თითქმის სავსე იყო. ანგარიში მე–10 წუთზე ზესტაფონელი მცველების უყურადღებობის შემდეგ "ამერის" ფორვარდმა სულიკო დავითაშვილმა გახსნა. საინტერესოა, რომ მან საქართველოს თასის გათამაშების მესამე ფინალში მოახერხა თავის გამოჩენა... 29–ე წუთზე ზესტაფონელთა უბერებელმა თავდამსხმელმა ზურაბ იონანიძემ გაათანაბრა – ამჯერად "ამერის" ფეხბურთელები შეცდნენ საჯარიმო დარტყმის შემდეგ და კართან უმეთვალყურეოდ დარჩენილმა ბომბარდირმაც შანსი ხელიდან არ გაუშვა – 1:1. მეორე ტაიმის დაწყება და თბილისელთა მეორე გოლი თითქმის ერთი იყო: გიორგი დეკანოსიძემ მარცხენა ფლანგიდან ჩააწოდა იმერელთა საჯარიმოში, იქ კი ახალგაზრდა რატი წინამძღვრიშვილმა მეურვეს დაასწრო და უძლიერესი თავური დარტყმით მეორედ შეარხია "ზესტაფონის" კარის ბადე. და მაშინ, როცა მსაჯის მიერ დამატებული მე–4 წუთი იწურებოდა და გულშემატკივრებიც ანგარიშს შეეგუენ, კობა ჟორჟიკაშვილის გუნდმა ბოლოჯერ გაიბრძოლა: მოედნის ცენტრიდან ზესტაფონელთა მეკარე გრიგოლ ჭანტურიამ საჯარიმო დარტყმა შეასრულა, რასაც უმეთვალყურეოდ დარჩენილი შალვა ღონღაძის თავური მოჰყვა – მეკარე ქვაჩახიამ "ამერი" გოლისგან ვერ იხსნა – 2:2. დამატებით დროში გუნდებმა სახიფათო მომენტები გაცვალეს, რის შემდეგაც პენალტების ჯერი დადგა. სერია "ამერმა" დაიწყო: გიორგი დეკანოსიძემ შანსი ვერ გამოიყენა – ბურთი კარს ააცილა. განუგრავას წინ გაჰყავს "ზესტაფონი"... გოგი ფიფიას დარტყმამდე იმერლები ლიდერობდნენ, თუმცა ამის შემდეგ ანგარიში თანაბრდება – მეკარემ თავდამსხმელს აჯობა... ზესტაფონელთა ბოლო პენალტის წინ "ამერი" 4:3–ს იგებდა. უკანასკნელი დარტყმის შესრულება მეკარე გრიგოლ ჭანტურიამ ითავა, თუმცა კოლეგა ქვაჩახიამ აჯობა და თასიც "ამერს" დარჩა! უმაღლესი ლიგის დებიუტანტმა კლუბმა დავით ყიფიანის სახელობის საქართველოს თასი აღმართა! "ამერი" 2006–07 წლების სეზონში უეფა–ს თასის გათამაშებაში ჩაერთვება. მატჩის საუკეთესო ფეხბურთელებად "ამერის" და "ზესტაფონის" თავდამსხმელები რატი წინამძღვრიშვილი და ზურაბ იონანიძე დაასახელეს, რომლებიც მის საქართველო 2005–მა სალომე ხელაშვილმა დაასაჩუქრა. დავით ყიფიანის სახელობის საქართველოს თასის ფინალი. 13 მაისი. თბილისი, "მიხეილ მესხი". 10.000 "ამერი" (თბილისი) 2:2 (პენ 4:3) "ზესტაფონი" (ზესტაფონი) გოლები: 1:0 დავითაშვილი (10), 1:1 იონანიძე (29), 2:1 წინამძღვრიშვილი (50), 2:2 ღონღაძე (90) პენალტების სერია: 0:0 დეკნოსიძე (ააცილა), 0:1 განუგრავა, 1:1 ბოლქვაძე, 1:2 იმედაძე, 2:2 ტატანაშვილი, 2:2 ფიფია (მეკარე), 3:2 დავითნიძე, 3:3 იონანიძე, 4:3 ხვადაგიანი, 4:3 ჭანტურია (მეკარე) "ამერი": ქვაჩახია, კედელაშვილი, დავითნიძე (კაპ), ხვადაგიანი, ელბაქიძე, დეკანოსიძე, დობროვოლსკი, ბოლქვაძე, სევასტოპულო (დოლიძე 60), დავითაშვილი (კვახაძე 78), წინამძღვრიშვილი (ტატანაშვილი 72) მწვრთნელი: გიორგი ჩიხრაძე
| 
